Tau 2 hnub tsis muaj leejtwg kis tus kab mob COVID-19 ntxiv lawm. Tiamsis muaj 3 leeg uas twb zoo lawm rov qab mob dua, tagnrho muaj 6 leej zoo li no. Qhov no txhais tau hais tias, txawm lawv zoo lawm los lawv tej roj ntshav tsis tau muaj zog txaus tiv thaiv tus kab mob. Txog hnub no, tebchaws Vietnam muaj 270 leej raug tus kab mob lawm, tiamsis tsis tau muaj ib tug pejxeem tuag li.
Tseem fwv tebchaws tau tso cai rau lub nroog Hanoi rov qhib kev ua lag ua luam zuj zus. Tsheb qhua yuav pib khiav ib lub xeev mus rau ib lub xeev, tiamsis tsis pub thauj qhua coob coob. Dav hlau yuav pib xa qhua rau tej lub xeev thiab nroog nyob hauv tebchaws xwb. Tsis tau pub ya mus txawv tebchaws. Ib txhia tsev kawm ntawv twb rov qhib rau tub ntxhais kawm nyob theem 9 mus txog 12 tuaj kawm lawm. Tsev kawm ntawv qib siab yuav qhib hnub xiab 4 lub 5 hli ntuj.
Xyoo no, cov tub ntxhais hluas kawm ntawv tiav theem 12 yuav tau mus twv ntawv nkag tsev kawm ntawv qib siab nyob rau lub 8 hli ntuj. Txhua xyoo yog lub 6 hli ntuj, tiamsis vim kab mob COVID-19, xyoo no muab ncua 2 lub hli. Xyoo no, cov xibhwb qhia ntawv hauv zej hauv zos yog cov yuav saib xyuas kev twv ntawv zaum no, tiamsis cov lus nug hauv cov ntawv twv yog nomtswv saib xyuas kev kawm (Bộ Giáo dục và Đào tạo) xa tuaj.
(c) Copyright 2020 HMOOB.TV
Leave a Reply