Nag hmo, muaj 2 tug kis kab mob COVID-19 ntxiv. Ob tug tau mus kawm ntawv txawv tebchaws nyob Japan (Nhật Bản) nyuam qhuav los txog tsev. Tagkis no, muaj 5 tug uas zoo lawm rov qab mob dua. Tagnrho tebchaws Vietnam muaj 270 leej raug tus kab mob lawm, tiamsis tsis tau muaj ib tug pejxeem tuag li.
Tseem fwv tebchaws tau tso cai rau lub nroog Hanoi rov qhib kev ua lag ua luam zuj zus. Tsheb qhua yuav pib khiav ib lub xeev mus rau ib lub xeev, tiamsis tsis pub thauj qhua coob coob. Dav hlau yuav pib xa qhua rau tej lub xeev thiab nroog hauv tebchaws. Tamsim no tseem tsis tau pub mus txawv tebchaws. Tsev kawm ntawv yuav rov qab qhib dua hnub xiab 4 lub 5 hli ntuj rau cov kawm qib siab. Cov tsev kawm rau menyuam yaus yuav tos txog hnub 11 lub 5 hli ntuj. Kev pehawm thiab sib tw uasi tseem tsis tau pub qhib.
Xyoo no, cov tub ntxhais hluas kawm ntawv tiav theem 12 yuav tau mus twv ntawv nkag tsev kawm ntawv qib siab nyob rau lub 8 hli ntuj. Txhua xyoo yog lub 6 hli ntuj, tiamsis vim kab mob COVID-19, xyoo no muab ncua 2 lub hli. Xyoo no, cov xibhwb qhia ntawv hauv zej hauv zos yog cov yuav saib xyuas kev twv ntawv zaum no, tiamsis cov lus nug hauv cov ntawv twv yog nomtswv saib xyuas kev kawm (Bộ Giáo dục và Đào tạo) xa tuaj.
(c) Copyright 2020 HMOOB.TV
Leave a Reply