Yog tsis suav cov pejxeem kis kab mob COVID-19 nyob txawv tebchaws, ces Vietnam tsis tau muaj sib kis tau 13 hnub lawm. Muaj 7 leej uas twb zoo lawm rov qab mob dua. Qhov no txhais tau hais tias, txawm zoo lawm los tej roj ntshav tsis tau muaj zog txaus tiv thaiv tus kab mob. Txog hnub no, tebchaws Vietnam muaj 270 leej raug tus kab mob lawm, tiamsis tsis tau muaj ib tug tuag li.
Tseem fwv tebchaws tau tso cai rau cov nroog loj xwsli Hanoi thiab Ho Chi Minh City rov qhib kev ua lag ua luam zuj zus. Tsheb qhua yuav pib khiav ib lub xeev mus rau ib lub xeev, tiamsis tsis pub thauj qhua coob coob. Tsheb dav hlau yuav pib xa qhua mus thoob tebchaws, tiamsis tsis pub mus txawv tebchaws.
Tsev kawm ntawv theem 9 mus txog 12 twb rov qhib lawm. Xyoo no, kev twv ntawv nkag tsev kawm ntawv qib siab muab hloov mus rau lub 8 hli ntuj lawm. Cov xibhwb qhia ntawv hauv zej hauv zos yog cov yuav saib xyuas kev twv ntawv zaum no, tiamsis cov lus nug hauv cov ntawv twv yog nomtswv saib xyuas kev kawm (Bộ Giáo dục và Đào tạo) xa tuaj. Ib txhia tsev kawm ntawv menyuam yaus yuav qhib hnub xiab 4 lub 5 hli ntuj, tiamsis yuavtsum muaj kev tiv thaiv kab mob, yog tsis muaj ces tsis tau pub qhib.
Thawj nom Nguyễn Xuân Phúc muaj lus tshab xov rau pejxeem Vietnam hais tias, txawm tebchaws rov qab qhib ua lag ua luam lawm los sawvdaws yuavtsum nco ntsoov txog kev tiv thaiv tus kab mob COVID-19. Qhov tseemceeb tshaj yog kev looj ntsejmuag thiab ntxuav tes. Tso cai rau tuam txhab coj neeg ncig tebchaws ua haujlwm tiamsis yuavtsum tiv thaiv kab mob kom zoo. Hnub 30 lub 4 hli ntuj yog hnub nco txog tebchaws Vietnam rov qab los uake.
(c) Copyright 2020 HMOOB.TV
Leave a Reply