Nyablaj (Vietnam): Tau ob peb hnub no, tsis pom muaj leejtwg kis mob COVID-19 ntxiv lawm. Tamsim no, tagnrho tebchaws muaj 268 leej raug tus kab mob no. Muaj txog 214 leeg twb zoo lawm. Hnub 16 lub 4 hli ntuj yog hnub kawg uas tseem fwv tebchaws txwv tsis pub pejxeem tawm nraum zoov. Tebchaws yuav pib qhib zuj zus, tiamsis tej lub nroog thiab xeev yuav muaj kev tswjfwm ntxiv kom tsis txhob kis cov kab mob. Tej lub zos uas tsis muaj kab mob yuav rov qab qhib kev kawm ntawv rau cov tub thiab ntxhais kawm ntawv.
Lostsuas (Laos): Tsis tau muaj leejtwg raug kab mob COVID-19 tau 7 hnub lawm. Tseem fwv tebchaws tau tshaj tawm hais tias yuav tsis pub pejxeem tawm sab nraud mus txog hnub xiab 3 lub 5 hli ntuj. Tsev kawm ntawv yuav kaw txog hnub ntawm no thiab. Nomtswv nqua hu pejxeem sawvdaws koom tes rau kev tiv thaiv yus tus kheej thiab tsev neeg thiaj muaj kev vam meej rau lub tebchaws thaum tej kab mob no dua mus tas.
Thaibteb (Thailand): Muaj 27 leej raug kab mob COVID-19 ntxiv rau hnub no, tiamsis tsis muaj leejtwg tuag. Tagnrho tebchaws muaj 2792 leej neeg raug lawm, 746 leej tseem pw tsev kho mob, thiab 47 tau tuag lawm. Pejxeem Thaib yuav tau txais kev pab cuam los ntawm nomtswv txog li 5,000 baht. Tsis tas li ntawd, cov ua poob haujlwm vim tus kab mob yuav tau kev pab los ntawm nomtswv txog 62% nyiaj hli.
Cov nom cov tswv sablaj hais tias yuavtsum muaj 5 yam ua ntej yuav rov qab qhib kev ua lag ua luam zoo li qub. 1) Kuaj txhua tus neeg nkag tebchaws thiab muab kaw hauv tsev yog muaj kab mob. 2) Pejxeem yuavtsum looj ntsejmuag thiab txhob nyob sib ze. 3) Koomhaum saib xyuas lag luam mam li tshaj tawm hais txog cov lag luam twg yog cov qhib tau ua ntej. 4) Tej lub tsev kawm ntawv thiab chaw uasi uas tsis muaj cov raug kab mob coob yuav qhib tau yog tibneeg tsis txhob nyob sib ze. 5) Yuavtsum tsim muaj ib lub koomhaum saib xyuas thiab tshuaj cov raug kab mob txhua lub sijhawm.
Mekas (U.S.A.): Hnub no muaj txog 746,625 leej raug tus kab mob COVID-19 lawm. Cov tuag muaj txog 39,083. Tseem fwv tebchaws muab tau $349 billion USD los pab cov tuam txhab lag luam them neeg ua haujlwm thiab them nujnqis. Tiamsis hnub 17 lub 4 hli ntuj, pob nyiaj no siv tag du lug lawm. Cov nom cov tswv tseem tabtom sablaj saib puas yuav ntxiv nyiaj rau tes haujlwm no.
Lub xeev Minnesota yuav nyob tsev txog hnub xiab 4 lub 5 hli ntuj. Lub xeev Wisconsin yuav nyob tsev txog hnub 26 lub 5 hli ntuj. Muaj ntau lub xeev yuav koom tes uake txog kev qhib lag luam thiab pub pejxeem tawm zoo licas. Qhov uas lawv tseem tham yog yuav ua licas thiaj muaj kev kuaj mob txaus rau pejxeem txhua tus. Tamsim no tsis paub tias cov mob coob npaum licas vim tsis muaj kev kuaj txaus.
(c) Copyright 2020 HMOOB.TV
Leave a Reply