Mekas (U.S.A.): Hnub no muaj txog 661,712 leeg raug tus kab mob COVID-19 lawm. Cov tuag muaj txog 33,049. Haiv neeg dawb thiab haiv neeg dub yog cov raug coob tshaj. Muaj ib txhia pejxeem tsis kam nyob tsev lawm. Lawv mus tawm suab tom tej lub tsev nom kom nomtswv rov qhib tebchaws cia kev lag luam rov muaj dua li qub. Lub xeev Minnesota yuav nyob tsev txog hnub xiab 4 lub 5 hli ntuj. Lub xeev Wisconsin yuav nyob tsev txog hnub 26 lub 5 hli ntuj. Muaj ntau lub xeev yuav koom tes uake txog kev qhib lag luam thiab pub pejxeem tawm zoo licas. Qhov tseemceeb yog kom muaj kev kuaj mob txaus rau pejxeem txhua tus.
Cobtsib (Vietnam): Nyob rau hnub 18 lub 4 hli ntuj, tsis pom muaj leejtwg kis mob COVID-19 ntxiv lawm. Tamsim no, tagnrho tebchaws muaj 268 leej raug tus kab mob no. Muaj txog 201 leeg twb zoo lawm. Hnub 16 lub 4 hli ntuj yog hnub kawg uas tseem fwv tebchaws txwv tsis pub pejxeem tawm nraum zoov. Tebchaws yuav pib qhib zuj zus, tiamsis tej lub nroog thiab xeev yuav muaj kev tswjfwm ntxiv kom tsis txhob kis cov kab mob.
Lostsuas (Laos): Tsis tau muaj leejtwg raug kab mob COVID-19 tau 6 hnub lawm. Tseem fwv tau tshaj tawm hais tias yuav tsis pub pejxeem tawm sab nraud mus txog hnub xiab 3 lub 5 hli ntuj. Tsev kawm ntawv yuav kaw txog hnub ntawm no thiab. Nomtswv nqua hu pejxeem sawvdaws koom tes rau kev tiv thaiv yus tus kheej thiab tsev neeg thiaj muaj kev vam meej rau lub tebchaws thaum tej kab mob no dua mus tas.
Thaibteb (Thailand): Muaj 33 leej raug kab mob COVID-19 ntxiv rau hnub no, tiamsis tsis muaj leejtwg tuag. Tagnrho tebchaws muaj 2733 leej neeg raug lawm, thiab 899 leeg tseem pw tsev kho mob. Tseem fwv tebchaws yuav pib qhib tej lub khw thiab chaw ua haujlwm lub limtiam tom ntej no. Tsis tas li ntawd, pej xeem Thaib yuav tau txais kev pab cuam los ntawm nomtswv txog li 5,000 baht.
(c) Copyright 2020 HMOOB.TV
Leave a Reply